اسلام آباد۔3دسمبر (اے پی پی) وفاقی وزیرداخلہ محسن نقوی دی زیرصدارت نیشنل ایکشن پلان دی کوآرڈینیشن کمیٹی دا اہم اجلاس تھیا۔ اجلاس اچ نیکٹا اتے صوبیاں وچال کوآرڈینیشن بہتر کرݨ دا فیصلہ کیتا ڳئیا۔ وفاقی وزیرداخلہ محسن نقوی آکھیا جو مؤثر کوآرڈینیشن کیتے نیشنل فیوژن سنٹر ٻݨآ ݙتا ڳئے۔ بریفنگ اچ آکھیا ڳئیا جو ایں سال اکتوبر تئیں 7984 انٹیلی جنس بیسڈ آپریشنز اچ 206 دہشت گرداں کوں جہنم واصل کیتا ڳئے۔ اجلاس اچ سوشل میڈیا تے کالعدم دہشت گرداں تنظیماں دی سرگرمیاں روکݨ کیتے جامع اقدامات دا فیصلہ کیتا ڳئیا۔ ایں بارے پی ٹی اے دے تعاون نال دہشت گرد گروپاں دے اکآوںٹ بلاک کیتے ویسن اتے غیر قانونی سمز دی روک تھام کیتے صوبے جامع حکمت عملی دے تحت کم کریسن۔ آندے اجلاس اچ پی ٹٰی اے سودھے سارے متعلقہ اداریاں دے اعلیٰ حکام کوں موثر میکنزم پیش کرݨ دی ہدایت کیتی ڳئی۔ وزیر داخلہ آکھیا جو صوبہ بلوچستان اتے صوبہ خیبر پختونخوا اچ دہشتگردی دے اڄوکے واقعے افسوس ناک اتے قابل مذمت ہن۔ دہشت گردی نال نبڑݨ کیتے بلوچستان اتے خیبرپختونخوا اچ کاؤنٹر ٹیررزم فورس دی پیشہ وارانہ صلاحیتاں کوں بہتر ٻݨاوݨ کیتے تعاون کریسوں ۔ وزیرداخلہ محسن نقوی قانون نافذ کرݨ آلے اداریاں دی لوڑ ترجیحی بنیاداں تے پوری کرݨ دا اعلان کریندیں ہوئیں ست ݙینھ اچ سارے اداریاں کوں ضرورت بارے رپورٹ وزارت داخلہ ٻھجواوݨ دی ہدایت کیتی اے۔ اجلاس اچ نیشنل کوآرڈینیٹر نیکٹا خالد خٹک ݙوجھے اجلاس تے عملدرآمد بارے تفصیلی بریفنگ ݙتی۔ وفاقی سیکرٹری داخلہ، نیشنل کوآرڈینیٹر نیکٹا، سارے آئی جی، آئی جی ریلویز پولیس، کمانڈنٹ فرنٹیئر کانسٹیبلری، آئی جی اسلام آبادپولیس، وزارت داخلہ اتے قانون نافذ کرݨ آلے اداریاں دے اعلیٰ حکام وی اجلاس اچ شریک تھیے۔
