دوائیاں دیاں قیمتاں دی پہنچ عام آدمی تئیں ہوونڑیں چاہیدی ہے ،ملک اچ تیار تھیونڑ آلیاں دوائیاں دی عالمی ادارہ صحت توں تصدیق سانگے لیبارٹری وختی فعا ل کیتی ونجے
راولپنڈی ۔ 18 اپریل (اے پی پی) صدر مملکت ممنون حسین ہدایت کیتی ہے جو دوائیاں دیاں قیمتاں عام آدمی دی پہنچ اچ ہوونڑیاں چاہیدیاں ہن تاں جو گھٹ آمدنی آلے لوک دی اطمینان نال اپنڑاں علاج کرا سگن ۔ صدر مملکت اے گالھ وفاقی سیکرٹری صحت محمد ایوب شیخ نال گالھ مہاڑ کریندے ہوئیں آکھی جنہاں منگل کوں ایوانِ صدر اچ انہاں نال ملاقات کیتی۔صدر مملکت آکھیا جو پاکستان اچ تیار تھیونڑ آلیاں دوائیاں دی عالمی ادارہ صحت توں تصدیق سانگے لیبارٹری وختی فعال کیتی ونجے تاں جو پاکستانی دوائیاں دی بر آمدات اچ ودھار ا تھی سگے ۔ انہاں آکھیا جو دنیا دے بہوں سانگے ملک پاکستان توں دوائیاں گھننڑ اچ دلچسپی رکھیندے ہن ۔ عالمی ادارہ صحت دی تصدیق نہ تھیونڑ دی وجہ توں برآمدات اچ ودھارا کائنی تھیندا پیا ۔صدر مملکت اسلام آباد اتے لاہور اچ عالمی ادارہ صحت دے معیار دے مطابق دوائیاں ٹیسٹ کرنڑ آلی لیبارٹری دے قیام دے سلسلے اچ محکمہ صحت دیاں کوششاں دی تعریف کیتی تے آکھیا جو اے لیبارٹریاں وختی پوریاں تھیونڑیاں چاہیدیاں ہن ۔ صدر مملکت ہپاٹائٹس سی دی جان بچاونڑ آلی دوا دی پاکستان اچ تیاری تے سستے نرخاں تے دستیابی تے مسرت دا اظہار کریندے ہوئیں آکھیا جو ایں طریقے نال ضروری دوائیاں دی تیاری تے وی توجہ ڈتی ونجے ۔ایں موقع تے وفاقی سیکریٹری صحت محمد ایوب شیخ دوائیاں دیاں قیمتاں بارے پالیسی اچ محکمہ صحت ولوں صدر مملکت کو آں ڈسایا تے ڈبلیو ایچ او دے معیار دے مطابق اسلام آباد اتے کراچی اچ لیبارٹری دے قیام نال تکھے کم جاری ہے تے آندے کجھ مہینے دے دوران پاکستان اچ دواسازاں کوں دوائیاں دی تصدیق دی سہولت حاصل تھی ویسی ۔
